Azad edilmiş ərazilərdə 11 mindən çox şəxsin məşğulluğu təmin olunub
Elpress.az xəbər verir ki, İşğaldan azad edilmiş ərazilərə indiyədək 9 714 ailə, ümumilikdə 39 269 nəfər köçürülüb.Əmək və əhalinin sosial müdafiəsi nazirinin müavini Rəşad Mustafayev Xankəndidə keçirilən “Regional məşğulluq ekosisteminin qurulması: İşəgötürənlərlə birgə fəaliyyət mexanizmləri” mövzusunda dəyirmi masada bildirib ki, köçürülən vətəndaşların 26 mindən çoxu əmək qabiliyyətli yaşdadır.Onun sözlərinə görə, bu şəxslər arasında 13 050 nəfər iqtisadi fəal əhali hesab olunur. Onlardan 11 681 nəfərin məşğulluğu artıq təmin edilib.Nazir müavini qeyd edib ki, işlə təmin olunanların 7 915 nəfəri, yəni təxminən 68 faizi əmək bazarında mövcud olan real vakansiyalar üzrə işə yerləşdirilib.Rəşad Mustafayev bu göstəricilərin Böyük Qayıdış prosesinin tədricən yeni mərhələyə keçdiyini göstərdiyini vurğulayıb.
