Azərbaycan Hava Yolları 2026-cı ilin ilk altı ayında 1,9 milyon sərnişinə xidmət göstərərək sərnişin daşımalarında ötən ilin eyni dövrü ilə müqayisədə 5 faiz artım qeydə alıb.
Elpress.az xəbər verir ki, Azərbaycan Hava Yolları 2026-cı ilin ilk yarısında marşrut şəbəkəsini genişləndirmək, donanmasını yeni nəsil təyyarələrlə gücləndirmək və rəqəmsal xidmətlərini inkişaf etdirmək istiqamətində fəaliyyətini davam etdirib. Hesabat dövründə aviaşirkət ümumilikdə 1,9 milyon sərnişinə xidmət göstərib. Beynəlxalq istiqamətlər üzrə səyahət edənlərin sayı 4 faiz artaraq 1,6 milyona çatıb, ümumilikdə isə 8 462 reys həyata keçirilib ki, bu da ötən ilin eyni dövrü ilə müqayisədə 7 faiz çoxdur.Bu müddətdə AZAL Şımkent istiqamətinə birbaşa uçuşlara başlayıb, Aktöbə, Atırau, Brüssel və Qars marşrutları üzrə müntəzəm reyslər üçün bilet satışını açıb. Hazırda aviaşirkətin marşrut şəbəkəsi 52 istiqaməti əhatə edir. Sərnişinlərin ən çox üstünlük verdiyi şəhərlər isə Moskva, İstanbul, Tbilisi, Təl-Əviv və Ankara olub.Hesabat dövründə donanmaya iki ədəd Airbus A320neo və AZAL tarixində ilk Airbus A321neo daxil olmaqla üç yeni nəsil təyyarə əlavə edilib. Bununla da istismarda olan təyyarələrin sayı 29-a yüksəlib. Bakı–Naxçıvan–Bakı marşrutu üzrə isə 1 868 reys yerinə yetirilib və 367 mindən çox sərnişin daşınıb ki, bu da hər iki göstərici üzrə 10 faizlik artım deməkdir.Bundan əlavə, aviaşirkət sərnişinlər üçün bir sıra yeni rəqəmsal xidmətləri istifadəyə verib. Onlayn əlavə baqaj xidmətinin genişləndirilməsi, “Stopover” və avtomobil icarəsi xidmətlərinin tətbiqi, müxtəlif beynəlxalq ödəniş sistemləri ilə inteqrasiya və xüsusi rouminq paketlərinin təqdim edilməsi sərnişinlər üçün xidmət keyfiyyətinin daha da artırılmasına xidmət edib.
