Azərbaycanda kənd təsərrüfatında su ehtiyatlarından səmərəli istifadənin artırılması və məhsuldarlığın yüksəldilməsi məqsədilə müasir texnologiyaların tətbiqi genişləndiriləcək.
Elpress.az xəbər verir ki, bunu kənd təsərrüfatı nazirinin müavini Seymur Səfərli Qubada keçirilən regional müşavirədə deyib.Onun sözlərinə görə, “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nda müasir suvarma sistemlərinin tətbiqi əsas prioritetlərdən biri kimi müəyyən edilib.Nazir müavini bildirib ki, pivot, damlama, mikroyağmurlama və sprinkler suvarma sistemlərinin tətbiqinin genişləndirilməsi nəzərdə tutulur. Hazırda ölkədə müasir suvarma sistemləri 130 min hektar ərazini əhatə edir və 2030-cu ilədək bu göstəricinin 300 min hektara çatdırılması planlaşdırılır.Seymur Səfərli qeyd edib ki, proqram çərçivəsində fermerlərə müasir suvarma sistemlərinin güzəştli şərtlərlə təqdim edilməsi, həmçinin qalıq dəyərinin güzəştli kreditlər vasitəsilə maliyyələşdirilməsi üçün mexanizmlər hazırlanacaq.O əlavə edib ki, kənd təsərrüfatı texnikası parkının yenilənməsi də əsas istiqamətlərdəndir. Belə ki, 22 hədəf rayon üzrə kombayn parkının 571 yeni kombaynla gücləndirilməsi nəzərdə tutulur.Nazir müavininin sözlərinə görə, Dövlət Proqramında lazer hamarlama texnologiyasının tətbiqi üçün subsidiya mexanizminin yaradılması da yer alıb. Bu çərçivədə 22 rayonda ümumilikdə 84,9 min hektar sahədə lazer hamarlamanın həyata keçirilməsi planlaşdırılır.
