Xəyyam İsmayılov: BOKT sektorunda 4 mindən çox şəxs çalışır
Elpress.az xəbər verir ki, Azərbaycanda bank olmayan kredit təşkilatlarının (BOKT) regionlarda təmsilçilik səviyyəsi bəzi banklarla müqayisədə daha yüksəkdir.Azərbaycan Mərkəzi Bankının Bank olmayan kredit təşkilatlarının fəaliyyətinə nəzarət departamentinin direktoru Xəyyam İsmayılov bildirib ki, BOKT-ların regionlarda geniş təmsil olunması maliyyə xidmətlərinə çıxışı məhdud olan əhalinin bu xidmətlərdən yararlanmasına imkan verir.Onun sözlərinə görə, hazırda BOKT sektorunda 4 mindən çox şəxs çalışır və bu göstərici üzrə artım müşahidə edilir.AMB rəsmisi sektor üzrə məlumatların açıqlığının da artırıldığını qeyd edib. Bildirib ki, Mərkəzi Bank BOKT-ların mənfəət və zərər, balans və digər maliyyə göstəricilərini ictimaiyyətə açıqlayır.Xəyyam İsmayılovun sözlərinə görə, maliyyə məlumatlarının ictimailəşdirilməsi BOKT-ların fəaliyyətində intizamın yüksəldilməsinə və sektorun sağlamlaşdırılmasına xidmət edir.O əlavə edib ki, son illərdə BOKT-larda korporativ idarəetmə və daxili nəzarət mexanizmlərinin təkmilləşdirilməsi istiqamətində də tədbirlər görülür.
