Yeni model avtobusların hərəkət qrafikinə və xidmət keyfiyyətinə nəzarəti gücləndirəcək
Elpress.az xəbər verir ki, Azərbaycanda müntəzəm sərnişin daşımalarında “brutto müqavilə” modelinin tətbiqinə başlanılıb. Yeni sistem çərçivəsində daşıyıcılara sərnişin sayından deyil, qət edilən məsafə və göstərilən xidmətin keyfiyyətindən asılı olaraq ödəniş ediləcək.Nazirlər Kabinetinin 31 iyul 2026-cı il tarixli 250 nömrəli qərarı ilə təsdiqlənən qaydalara əsasən, marşrutlar üzrə avtobusların sayı, hərəkət intervalı, qət ediləcək məsafə və digər xidmət göstəriciləri əvvəlcədən müəyyənləşdirilir. Daşıyıcılar müəyyən edilmiş tələblərə uyğun xidmət göstərdikləri halda müvafiq ödəniş alacaqlar.Yeni mexanizmin əsas məqsədlərindən biri sərnişin axınının az olduğu saatlarda, o cümlədən axşam vaxtlarında avtobusların marşrutlardan çıxmamasını və müəyyən edilmiş qrafikə uyğun hərəkət etməsini təmin etməkdir.“Brutto müqavilə” modelinin tətbiqi nəticəsində sərnişinlər üçün daha müntəzəm, etibarlı və proqnozlaşdırılan ictimai nəqliyyat xidmətinin formalaşdırılması nəzərdə tutulur. Sistem eyni zamanda daşıyıcıların yalnız gəlirli marşrutlara üstünlük verməsinin qarşısını almağa, şəhərətrafı və azrentabelli xətlərdə xidmət səviyyəsini yüksəltməyə imkan verəcək.İlk mərhələdə 130, 205, 211, 500 və 503 nömrəli müntəzəm marşrutlar yeni sistemə qoşulub. Müəyyən edilmiş tələblərə uyğun olaraq digər marşrutların da mərhələli şəkildə bu modelə keçirilməsi planlaşdırılır.Yeni sistem daşıyıcıların fəaliyyətinə nəzarət imkanlarını da genişləndirir. Xidmət keyfiyyəti ilə bağlı tələblərin pozulması halında müqavilə çərçivəsində maliyyə və digər təsir tədbirləri tətbiq ediləcək. Bunun üçün xüsusi proqram təminatı vasitəsilə göstərilən xidmətlərin keyfiyyətinin ölçülməsi və marşrutların fəaliyyətinə nəzarət həyata keçiriləcək.Modelin tətbiqi daşıyıcıların maliyyə dayanıqlığının və uzunmüddətli planlaşdırma imkanlarının artırılmasına da şərait yaradacaq. Bu isə avtobus parkının yenilənməsi, müasir və ekoloji təmiz nəqliyyat vasitələrinin alınması, texniki xidmətin yaxşılaşdırılması və xidmət keyfiyyətinə investisiyaların artırılması baxımından əlavə imkanlar yaradacaq.
