Kiyev Rusiyanın hava məkanında mülki aviasiya üçün risklərin artdığını bildirib
Elpress.az xəbər verir ki, Ukrayna Beynəlxalq Mülki Aviasiya Təşkilatına (ICAO) müraciət edərək Rusiya hava məkanında mülki aviasiya üçün təhlükələrin artdığını bildirib və bu marşrutlar üzrə uçuşlara yenidən baxılmasına çağırıb.
Kiyevin göndərdiyi məktubda vurğulanıb ki, ölkə BMT Nizamnaməsinin 51-ci maddəsinə uyğun olaraq özünümüdafiə hüququndan istifadə edir və Rusiyanın davam edən hava hücumlarına cavab tədbirləri görmək məcburiyyətindədir. Ukrayna tərəfi ICAO-dan Rusiya ərazisi üzərində həyata keçirilən mülki reyslərin təhlükəsizliyini qiymətləndirərkən artan riskləri nəzərə almağı istəyib. Müraciətdə bildirilib ki, pilotsuz uçuş aparatlarının fəallığının artması bəzi marşrutlar üçün əlavə təhlükələr yaradır. Bundan əvvəl Prezident Volodimir Zelenski də aviaşirkətlərə və sığorta şirkətlərinə müraciət edərək Rusiya hava məkanının getdikcə daha təhlükəli hala gəldiyini bildirmiş və ölkənin hava məkanının faktiki olaraq bağlanacağını bəyan etmişdi.
