Azərbaycan və Birləşmiş Ərəb Əmirliklərinin hərbi hava qüvvələri komandanları arasında görüş keçirilib. Tərəflər birgə təlimləri və hərbi əməkdaşlığın gələcək istiqamətlərini müzakirə ediblər.
Elpress.az xəbər verir ki, oktyabrın 19-da müdafiə nazirinin müavini, Hərbi Hava Qüvvələrinin komandanı general-leytenant Namiq İslamzadə BƏƏ Hərbi Hava Qüvvələri və Hava Hücumundan Müdafiə komandanı general-mayor Rəşid Məhəmməd Əl-Şəmsinin rəhbərlik etdiyi nümayəndə heyəti ilə görüşüb.
Görüş zamanı iki ölkənin hərbi qulluqçularının iştirakı ilə keçirilən birgə təlimlər və digər tədbirlər ətrafında fikir mübadiləsi aparılıb. Həmçinin ikitərəfli əlaqələrin genişləndirilməsi imkanları və qarşılıqlı maraq doğuran məsələlər nəzərdən keçirilib.
Səfər çərçivəsində BƏƏ nümayəndə heyəti müasir idarəetmə sistemləri ilə təchiz olunmuş təlim qərargahına baş çəkib, aviasiya texnikaları ilə tanış olub.
