Deputat pensiya yaşına çatmadan vəfat edən şəxslərin kapitalından ailələrinin yararlanmasını təklif edib
Elpress.az xəbər verir ki, Azərbaycanda pensiya kapitalından istifadə imkanlarının genişləndirilməsi və vətəndaş vəfat etdikdən sonra toplanmış vəsaitin taleyi ilə bağlı yeni təklif irəli sürülüb.Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov bildirib ki, vətəndaş pensiya yaşına çatmadan dünyasını dəyişdikdə onun topladığı pensiya kapitalının müəyyən hissəsinin, ən azı 30 faizinin varisinin hesabına köçürülməsi mümkün ola bilər.Deputatın sözlərinə görə, hazırda pensiya ödənişləri ilə pensiya kapitalına yanaşma fərqlidir. Şəxs pensiya aldığı müddətdə vəfat etdikdə müəyyən hallarda onun həyat yoldaşı və ya qanunvericiliyin tələblərinə cavab verən övladları ödənişlərdən yararlana bilirlər. Lakin toplanmış pensiya kapitalının varislərə ötürülməsi ilə bağlı ayrıca mexanizmin yaradılması təklif edilir.Vüqar Bayramov qeyd edib ki, müxtəlif ölkələrin təcrübələri də araşdırılıb. Onun sözlərinə görə, Sinqapur və Qazaxıstan kimi ölkələrdə pensiya kapitalından pensiya yaşına qədər müəyyən məqsədlər üçün istifadə imkanları mövcuddur. Bu vəsait bəzi hallarda daşınmaz əmlak, kredit ödənişləri və təhsil xərclərinə yönəldilə bilər.Deputat Azərbaycanda da minimum və orta pensiya kapitalı anlayışlarının tətbiq olunmasını təklif edib. Təklifə əsasən, vətəndaş minimum və orta pensiya kapitalını formalaşdırdıqdan sonra həmin məbləğdən artıq topladığı vəsaitdən pensiya yaşına çatmadan müəyyən istiqamətlər üzrə istifadə edə bilər.Bayramovun fikrincə, belə bir sistem həm şəxsin gələcək pensiya təminatını qorumağa, həm də topladığı vəsaitdən daha çevik istifadə etməsinə imkan verə bilər.O, pensiya yaşına çatmadan vəfat edən şəxslərin kapitalının müəyyən hissəsinin varislərə ötürülməsinin sosial və iqtisadi baxımdan əhəmiyyətli olduğunu vurğulayıb. Bildirib ki, bu mexanizm insanların rəsmi əmək münasibətlərinə marağını da artıra bilər.Deputat hesab edir ki, vətəndaş topladığı pensiya kapitalının gələcəkdə yalnız öz pensiya təminatına deyil, dünyasını dəyişəcəyi halda ailəsinə və övladlarına da fayda verə biləcəyini bildikdə əmək müqaviləsi ilə işləməyə və gəlirlərini rəsmiləşdirməyə daha çox maraq göstərə bilər.
