Ədliyyə Nazirliyi beynəlxalq axtarışda olan və cinayət törətməkdə ittiham edilən şəxslərin ölkəyə gətirilməsi istiqamətində xarici dövlətlərlə əməkdaşlığı davam etdirir. Nazirliyin yaydığı məlumata görə, İnterpolun Azərbaycan Respublikasındakı Milli Mərkəzi Bürosu tərəfindən beynəlxalq axtarışa verilmiş daha bir Azərbaycan vətəndaşı Türkiyədə saxlanılaraq ölkəmizə ekstradisiya olunub.
Elpress.az-ın Ədliyyə Nazirliyindən əldə etdiyi məlumata görə, 2020-ci ildə mütəşəkkil dəstə tərkibində külli miqdarda narkotik vasitələrin, psixotrop maddələrin və güclü təsir edən maddələrin qaçaqmalçılıq yolu ilə Azərbaycana gətirilməsində ittiham olunan Babayev Səbutər Adil oğlunun yeri Türkiyə Respublikasında müəyyən edilib və o, hüquq-mühafizə orqanları tərəfindən həbs olunub.
Baş Prokurorluğun təqdim etdiyi sorğu, beynəlxalq hüquqi prosedurlar və iki ölkə arasında aparılan danışıqlardan sonra həmin şəxsin Azərbaycana təhvil verilməsi barədə razılıq əldə edilib. Nazirlik bu əməkdaşlığın Azərbaycan ilə Türkiyə arasında hüquqi əlaqələrin yüksək səviyyədə olduğunu bir daha nümayiş etdirdiyini vurğulayıb.
Səbutər Babayev Ədliyyə Nazirliyinin Beynəlxalq əməkdaşlıq baş idarəsinin və Penitensiar xidmətin əməkdaşlarının müşayiəti ilə Türkiyənin Antalya şəhərindən Bakıya gətirilib. O, məhkəmənin qərarına əsasən istintaq dövrü üçün müvafiq istintaq təcridxanasına yerləşdirilib.
Ədliyyə Nazirliyi beynəlxalq axtarışda olan şəxslərin müəyyən edilərək ölkəyə gətirilməsi istiqamətində tədbirlərin davam etdirildiyini açıqlayıb.
