Azərbaycan və Birləşmiş Ərəb Əmirliklərinin hərbi aviasiya qüvvələri “Şahinlərin Görüşü-2026” adlı müştərək taktiki-uçuş təlimində iştirak edir.
Elpress.az xəbər verir ki, Müdafiə Nazirliyinin məlumatına görə, təlimin açılış mərasimi Azərbaycan Hərbi Hava Qüvvələrinin aviasiya bazasında keçirilib. Təlimə hər iki ölkənin hərbi hava qüvvələrinin aviasiya vasitələri və hava hücumundan müdafiə sistemləri cəlb olunub.
Mərasimdə Vətən uğrunda həlak olanların xatirəsi bir dəqiqəlik sükutla yad edilib, Azərbaycan və BƏƏ-nin dövlət himnləri səsləndirilib. General-mayor Zaur Rüstəmov çıxışında təlimin əhəmiyyətini vurğulayaraq iştirakçılara uğurlar arzulayıb.
Təlim iki ölkə arasında hərbi əməkdaşlıq üzrə birgə komitənin ilk iclasının protokoluna uyğun təşkil edilib. Açılış çərçivəsində iştirakçılara təlimin ssenarisi və qarşıda duran vəzifələr təqdim olunub, daha sonra hərbi aviasiya vasitələrinə baxış keçirilib.
