Dövlət İmtahan Mərkəzi 17 may 2026-cı il tarixində keçirilmiş magistratura qəbul imtahanının ilkin nəticələrini açıqlayıb. DİM-dən verilən məlumata görə, bakalavrların nəticələri qapalı və kodlaşdırıla bilən açıq tipli ümumilikdə 95 tapşırıq üzrə hesablanaraq elan edilib.
Bu barədə Elpress.az Dövlət İmtahan Mərkəzindən (DİM) əldə etdiyi məlumata görə, namizədlər imtahan nəticələri ilə Dövlət İmtahan Mərkəzinin rəsmi platforması vasitəsilə tanış ola bilərlər. Bununla yanaşı, iştirakçılar mobil operatorlar – Azercell, Bakcell və Nar üzərindən “iş nömrəsi”ni 7727 nömrəsinə göndərərək də topladıqları bal barədə məlumat əldə edə bilərlər.
DİM bildirib ki, yekun nəticələr xarici dil fənləri üzrə yazılmış esse tapşırıqları yoxlanıldıqdan sonra təqdim ediləcək. Esse mərhələsinin qiymətləndirilməsi təxminən 6 həftə davam edəcək və bundan sonra iştirakçıların yekun imtahan balı müəyyənləşdiriləcək. Qaydalara əsasən, qapalı və kodlaşdırıla bilən açıq tipli tapşırıqlar üzrə maksimum 95, esse üzrə isə 5 bal toplamaq mümkündür.
Həmçinin qeyd olunub ki, imtahan nəticələri ilə bağlı apellyasiya müraciətləri üçün şərait yekun bal elan edildikdən sonra yaradılacaq. Bakalavrlar yalnız yekun nəticələr açıqlanandan sonra apellyasiya prosesinə müraciət edə biləcəklər.
