Samux rayonunda baş verən ağır yol-nəqliyyat hadisəsi üç nəfərin həyatına son qoyub, bir nəfər isə xəstəxanada müalicə olunur.
Elpress.az xəbər verir ki, qəza rayon ərazisində “VAZ-2107” və “Mercedes” markalı minik avtomobillərinin toqquşması nəticəsində baş verib. Hadisə zamanı 1975-ci il təvəllüdlü S. Əhmədov, 1987-ci il təvəllüdlü F. Əhmədova və 1962-ci il təvəllüdlü A. Əliyeva həyatını itirib.
Qəza nəticəsində xəsarət alan iki nəfər ilkin olaraq Samux Rayon Mərkəzi Xəstəxanasına çatdırılıb. Onlara təcili tibbi yardım göstərildikdən sonra daha ixtisaslı müalicə üçün Gəncə Şəhər Birləşmiş Xəstəxanasının nəzdində fəaliyyət göstərən Abbas Səhhət adına xəstəxanaya təxliyə ediliblər.
TƏBİB-in məlumatına əsasən, yaralılardan biri müayinədən sonra ambulator müalicə üçün evə buraxılıb. Digər yaralının müalicəsi isə davam etdirilir və vəziyyəti orta ağır qiymətləndirilir.
Hadisə yerinə Fövqəladə Hallar Nazirliyinin xilasediciləri, polis və Dövlət Yol Polisi əməkdaşları cəlb olunub. Avtomobildə sıxılmış vəziyyətdə qalan üç nəfərin meyiti xilasedicilər tərəfindən çıxarılaraq aidiyyəti üzrə təhvil verilib, bir yaralı isə xilas edilərək həkimlərə təhvil verilib.
Faktla bağlı araşdırma aparılır.
