Göyçay rayonunda qeyri-sabit hava şəraiti bir sıra problemlərə yol açıb. Axşam saatlarında yağan leysan və müşahidə olunan güclü külək müxtəlif ərazilərdə fəsadlar törədib.
Elpress.az APA-ya istinadən xəbər verir ki, Ucar–Göyçay avtomobil yolunun kənarında yerləşən irigövdəli ağaclar güclü küləyin təsirindən aşaraq yolun hərəkət hissəsini bağlayıb. Nəticədə avtomobillərin hərəkətində məhdudiyyət yaranıb.Əraziyə operativ xidmət əməkdaşları cəlb olunub. Hazırda aşan ağacların ərazidən götürülməsi və yol hərəkətinin tam bərpası istiqamətində işlər aparılır.Təbiət hadisəsinin fəsadları rayonun Yeniarx kəndində də hiss olunub. Belə ki, qırılan ağacların elektrik xətlərinin üzərinə düşməsi səbəbindən kənddə elektrik enerjisinin verilməsində fasilə yaranıb.Sakinlərin verdiyi məlumata görə, güclü külək bəzi yaşayış evlərinin və yardımçı tikililərin dam örtüklərinə zərər vurub. Bundan əlavə, aşan ağaclardan biri minik avtomobilinə ziyan yetirib.İlkin məlumatlara əsasən, hadisə nəticəsində ölən və ya xəsarət alan olmayıb. Aidiyyəti qurumlar fəsadların aradan qaldırılması istiqamətində tədbirləri davam etdirirlər.
