Elpress.az xəbər verir ki, Türkiyədə son dövrlərdə qeydə alınan meşə yanğınları ölkənin təbii sərvətlərinə ciddi ziyan vurub. Rəsmi məlumatlara görə, baş verən 3 min 224 meşə yanğını nəticəsində 40 min 32 hektar meşə sahəsi tamamilə məhv olub.
Məlumata əsasən, yanğınların böyük hissəsi insan amili, xüsusilə də səhlənkarlıq səbəbindən baş verib. Təkcə ehtiyatsız davranışlar minlərlə hektar meşənin yanaraq külə dönməsinə gətirib çıxarıb.
Mütəxəssislər bildirirlər ki, son illərdə iqlim dəyişikliyi, havanın temperaturunun yüksəlməsi və rütubətin azalması meşə yanğınlarının daha sürətlə yayılmasına şərait yaradır. Bu səbəbdən Türkiyənin bir çox bölgəsində yanğın təhlükəsi yüksək olaraq qalır.
Rəsmi statistikaya görə, meşə yanğınları qəsd, qəza, səhlənkarlıq, təbii amillər və səbəbi müəyyən edilməyən hadisələr nəticəsində meydana gəlir. Lakin ən ağır nəticələr məhz səhlənkarlıqdan qaynaqlanan yanğınlarda qeydə alınıb.
