Elpress.az APA-ya istinadən xəbər verir ki, Ağdərə rayonunda mikroavtobusla minik avtomobilinin toqquşması nəticəsində bir neçə nəfər müxtəlif dərəcəli bədən xəsarətləri alıb.
İlkin məlumata görə, “Mercedes” markalı mikroavtobus “Niva” markalı minik avtomobili ilə toqquşub. Güclü zərbə nəticəsində xeyli sayda yaralanan olduğu bildirilib.
TƏBİB-in məlumatına əsasən, iyunun 28-də saat 09:30 radələrində 5 nəfər – 3 qadın və 2 kişi Bərdə Rayon Mərkəzi Xəstəxanasının Təcili tibbi yardım şöbəsinə çatdırılıb. Yaralılara dərhal zəruri tibbi yardım göstərilib və onların müalicəsi hazırda davam etdirilir.
Bildirilib ki, hospitalizasiya edilən şəxslərin vəziyyəti stabildir.
Hadisə yerinə təcili tibbi yardım briqadaları və hüquq-mühafizə orqanlarının əməkdaşları cəlb olunub. Qəzanın başvermə səbəbi, həmçinin xəsarət alanların dəqiq sayı ilə bağlı araşdırmalar davam etdirilir.
