Kürdəmirdə baş verən qəza nəticəsində magistral su xətti zədələnib, rayon mərkəzi və bir neçə yaşayış məntəqəsində su təchizatı dayanıb.
Elpress.az oxu.az-a istinadən xəbər verir ki, Kürdəmirdə Külüllü–Kürdəmir magistral su xəttində qəza baş verib. Hadisə xəttin 31-ci kilometrində, rayonun Qaraqocalı kəndi ərazisində qeydə alınıb.İlkin məlumata görə, diametri 500 millimetr olan magistral su borusu partlayıb. Nəticədə rayon mərkəzi və altı kəndin içməli su təchizatında fasilə yaranıb.Qəza yerinə Kürdəmir Su və Meliorasiya Sistemlərinin İstismarı İdarəsinin əməkdaşları və xüsusi texnikası cəlb olunub. Hazırda boru xəttinin bərpası və su təchizatının yenidən təmin edilməsi istiqamətində təmir işləri davam etdirilir.Qeyd edək ki, bu, sözügedən magistral su xəttində son aylarda baş verən ilk qəza deyil. Xətt bundan əvvəl də martın 27-də zədələnmişdi.Xatırladaq ki, 2013-cü ildə dövlət vəsaiti hesabına inşa edilən Külüllü–Kürdəmir magistral su xətti ümumilikdə 21 min nəfərin içməli su ilə təmin olunmasına xidmət edir
