Cəbrayıl rayonundan məcburi köçkün düşəndə cəmi 17 yaşı var idi. İllərlə doğma yurd həsrəti ilə yaşayan Ruhiyə Yadigarova bu gün, artıq 50 yaşına çatdığı bir vaxtda, böyük sevinc və qürur hissi ilə öz doğma kəndi Şükürbəyliyə qayıdır. O, bu tarixi günü həyatının ən unudulmaz anlarından biri kimi dəyərləndirib.
Elpress.az xəbər verir ki, jurnalistlərə açıqlama verən Ruhiyə Yadigarova bildirib ki, illər boyu doğma torpaqlara qayıdacaqları günü səbirsizliklə gözləyiblər. O, Vətən uğrunda canından keçən şəhidlərimizin əziz xatirəsini dərin ehtiramla yad edib, qazilərimizə isə sağlamlıq və uzun ömür arzulayıb.
“Allah bütün şəhidlərimizə rəhmət eləsin, qazilərimizə cansağlığı versin. Onların qəhrəmanlığı sayəsində bu günləri yaşayırıq. Uzun illərdən sonra doğma elimizə, obamıza dönmək çox böyük xoşbəxtlikdir. Bu sevincin sözlə ifadəsi çətindir”, – deyə o vurğulayıb.
Ruhiyə Yadigarova qeyd edib ki, ailəsi ilə birlikdə yenidən doğma kəndində yaşayacaq olmaq ona xüsusi qürur verir. O, Cəbrayılın yenidən qurulmasını, kəndlərdə həyatın bərpa olunmasını böyük ruh yüksəkliyi ilə izlədiyini bildirib.
O bildirib ki, illərlə çəkilən həsrətə baxmayaraq, doğma yurda olan bağlılıq heç vaxt azalmayıb. Bu gün isə həmin həsrətin yerini sevinc, qürur və böyük ümid hissləri əvəz edib.
