Bakının Xətai rayonunda qeydə alınan torpaq sürüşməsi ilə bağlı rəsmi açıqlama verilib.
Elpress.az xəbər verir ki, Geoloji Kəşfiyyat Agentliyinin İdarə Heyətinin sədri Əli Əliyevin sözlərinə görə, hadisə Xətai rayonu, Gəncə prospektində yaşayış binasından 24-25 metr məsafədə yerləşən, hündürlüyü 12-16 metr, uzunluğu isə 140-150 metr olan sərt kəsilmiş yamacın 28-30 metrlik hissəsində baş verib.
Bildirilib ki, sürüşmə torpaq qatının islanması nəticəsində yamacın asılı vəziyyətdə olan hissəsinin dayanıqlığının zəifləməsi və ağırlıq qüvvəsinin təsiri ilə torpaq kütləsinin yamac boyu hərəkət etməsi nəticəsində yaranıb.
Qeyd olunub ki, sürüşən torpaq kütləsinin həcmi təxminən 4,5–5 kubmetr təşkil edir.Rəsmi məlumata əsasən, ərazi aidiyyəti dövlət qurumlarının nəzarətində saxlanılır və təhlükəsizliyin təmin edilməsi istiqamətində zəruri tədbirlər görülür.
