Prezident İlham Əliyev “AzərEnerji” ASC-nin 220/110/10 kV-luq “Yeni Səngəçal” ana yarımstansiyasının açılış mərasimində iştirak edib.
Elpress.az xəbər verir ki, dövlət başçısına layihə barədə məlumat verilib.
Bildirilib ki, “Yeni Səngəçal” yarımstansiyası Azərbaycanın “Yaşıl Enerji” strategiyası çərçivəsində həyata keçirilən mühüm layihələrdən biridir. Yeni enerji infrastrukturu vasitəsilə Cəbrayılda istehsal olunan günəş enerjisinin ölkənin vahid enerji sistemi üzərindən Səngəçal terminalına ötürülməsi təmin ediləcək.
Qeyd olunub ki, layihənin reallaşması nəticəsində terminalın illik elektrik enerjisi tələbatı bərpa olunan enerji hesabına ödəniləcək, bununla da hər il 120–150 milyon kubmetr təbii qaza qənaət olunacaq və karbon emissiyaları əhəmiyyətli dərəcədə azalacaq.
Məlumata görə, ümumi sahəsi 6,5 hektar olan yarımstansiya 111 kilometrlik dörd yeni 220 kV-luq elektrik xətti ilə ölkənin enerji sisteminə qoşulub. Obyekt üç müstəqil enerji mənbəyindən qidalanır.Layihə çərçivəsində Səngəçal terminalına 25 kilometrlik 110 kV-luq hava kabeli də çəkilib və növbəti mərhələdə əlavə enerji xətlərinin inşası nəzərdə tutulur. Bu infrastruktur strateji enerji obyektlərinin daha etibarlı və dayanıqlı elektrik təchizatına xidmət edəcək.
