Özəl məhkəmə ekspertlərinin fəaliyyətinə nəzarətin gücləndirilməsi ilə bağlı yeni qaydaların tətbiqi təklif olunur.
Elpress.az xəbər verir ki, bununla bağlı “Məhkəmə ekspertizası fəaliyyəti haqqında” qanuna dəyişiklik layihəsi Milli Məclisin Hüquq siyasəti və dövlət quruculuğu komitəsinin iclasında müzakirəyə çıxarılıb.
Təklifə əsasən, fəaliyyət zamanı qanunvericiliyin tələblərini və icra intizamını pozan özəl məhkəmə eksperti intizam məsuliyyətinə cəlb edilə biləcək. Bunun üçün ayrıca İntizam Komissiyasının fəaliyyət göstərməsi nəzərdə tutulur.
İntizam icraatının müvafiq icra hakimiyyəti orqanının və ya Özəl Məhkəmə Ekspertlərinin Palatasının təqdimatı əsasında başlanılması planlaşdırılır. Komissiyanın yekun rəyi əsasında ekspertə tətbiq ediləcək tənbeh pozuntunun ağırlığından asılı olacaq.
Layihədə üç növ intizam tənbehi müəyyənləşdirilir: töhmət, 1 000 manatdan 2 000 manatadək cərimə və özəl məhkəmə eksperti şəhadətnaməsinin ləğvi.
Cərimədən əldə olunan vəsaitin Özəl Məhkəmə Ekspertlərinin Palatasının bank hesabına köçürülməsi nəzərdə tutulur.
Yeni qaydalara əsasən, intizam tənbehi pozuntu barədə məlumat əldə edildiyi gündən bir il, pozuntunun törədildiyi tarixdən isə iki il ərzində tətbiq edilə bilər. Müəyyən hallarda, o cümlədən məzuniyyət, ezamiyyət, müvəqqəti əmək qabiliyyətsizliyi, yoxlama və ya cinayət işi üzrə istintaq müddəti bu hesablamaya daxil edilməyəcək.
Ekspertə intizam tənbehi tətbiq edilməzdən əvvəl yazılı və ya şifahi xəbərdarlıq da verilə bilər. Lakin xəbərdarlıq intizam tənbehi hesab olunmayacaq.
Qanun layihəsində həmçinin reyestrdə olmayan şəxslərin özlərini “məhkəmə eksperti” adlandırmasına və təşkilatların adında “məhkəmə ekspertizası” ifadəsindən istifadəsinə məhdudiyyət qoyulması təklif edilir. Bu tələbin pozulması qanunvericiliklə müəyyən edilmiş məsuliyyətə səbəb olacaq.
