Tunel, stansiya, depo və xətlərin tikintisi üçün torpaq sahələrinin dövlət ehtiyacları üzrə alınması təklif olunur
Elpress.az xəbər verir ki, Azərbaycanda metro, dəmir yolu və tramvay infrastrukturu layihələrinin icrası üçün zəruri torpaq sahələrinin dövlət ehtiyacları üçün alınması ilə bağlı qanunvericiliyə dəyişiklik təklif edilir.Təklif Milli Məclisin Aqrar siyasət komitəsinin iclasında müzakirəyə çıxarılan “Torpaqların dövlət ehtiyacları üçün alınması haqqında” qanuna dəyişiklik layihəsində əksini tapıb. Bununla yanaşı, Mülki Məcəlləyə də müvafiq dəyişikliklərin edilməsi nəzərdə tutulur.Dəyişikliklərə əsasən, tunellərin, o cümlədən metro tunellərinin, dəmir yolu, metropoliten və tramvay xətlərinin, həmçinin stansiya və depoların tikintisi, quraşdırılması, bərpası və genişləndirilməsi üçün tələb olunan torpaq sahələrinin dövlət ehtiyacları üçün alınmasına hüquqi əsas yaradılacaq.Qanun layihəsinin əsas məqsədi bu sahədə torpaqların alınması prosedurlarını daha dəqiq tənzimləmək, hüquqi müəyyənliyi və şəffaflığı artırmaqdır.Dəyişikliklərin metro və dəmir yolu infrastrukturu üzrə strateji layihələrin daha sürətli və maneəsiz həyata keçirilməsinə şərait yaradacağı bildirilir.Qeyd edək ki, Bakı və ətraf ərazilərdə nəqliyyat infrastrukturunun inkişafı ilə bağlı 2025–2030-cu illəri əhatə edən Dövlət Proqramında yeni stansiya, depo və xətlərin tikintisi, eləcə də mövcud infrastrukturun bərpası və təkmilləşdirilməsi nəzərdə tutulur.Layihə dövlət ehtiyacları üçün torpaqların alınması zamanı dövlət və vətəndaş maraqlarının qanunvericilik çərçivəsində balanslaşdırılmasını da hədəfləyir.
