FHN xəbərdarlıq edir: Bu il qeyri-çimərlik ərazilərdə 40 nəfər suda boğularaq həlak olub
Elpress.az xəbər verir ki, Fövqəladə Hallar Nazirliyinin (FHN) yaydığı rəsmi məlumata əsasən, 2026-cı ilin çimərlik mövsümü başlayandan bu günə qədər qurumun nəzarət etdiyi rəsmi çimərliklərdə heç bir ölüm faktı qeydə alınmayıb. Nazirliyin dalğıc-xilasediciləri tərəfindən həmin ərazilərdə suda boğulma təhlükəsi ilə üzləşən 55 nəfər xilas edilib.Buna baxmayaraq, xilasedicilərin nəzarəti olmayan qeyri-çimərlik ərazilərdə bədbəxt hadisələr davam edir. Mövsüm ərzində nəzarətsiz su hövzələrində suda batan 40 nəfərin meyiti tapılaraq sudan çıxarılıb və aidiyyəti üzrə təhvil verilib. FHN bir daha əhaliyə çağırış edərək, təhlükəsizlik qaydalarına riayət etməyi və çimərlik üçün nəzərdə tutulmayan ərazilərdən istifadə etməməyi tövsiyə edir.
