Azərbaycan Milli QHT Forumu məktəblərdə şagird və müəllimlərin geyim qaydaları ətrafında aparılan müzakirələrin siyasiləşdirilməsinə etiraz edib.
Elpress.az xəbər verir ki, Forum bəyanatında xarici internet resurslarında Azərbaycanın dünyəvi dövlətçilik modelini hədəf alan və cəmiyyətdə qarşıdurma yaratmağa yönələn məlumatların yayıldığını bildirib.
Təşkilatın mövqeyinə görə, geyim məsələsinin dini qarşıdurma müstəvisinə keçirilməsi ictimai rəyi çaşdırmağa xidmət edir. Forum vətəndaşları milli maraqlara, Konstitusiya dəyərlərinə və ictimai həmrəyliyə qarşı yönələn informasiya təxribatlarına qarşı ayıq olmağa çağırıb.
Bəyanatda vurğulanıb ki, dünyəvilik Azərbaycanın dövlətçilik ənənəsinin mühüm hissəsidir. Ölkənin tarixi-mədəni irsində İslamın xüsusi yeri olsa da, müxtəlif dinlərin nümayəndələrinin dinc şəraitdə yaşaması da dövlətin əsas dəyərlərindən biri kimi təqdim edilib.
Forum məscid, kilsə və sinaqoqların yanaşı fəaliyyət göstərməsini, dini ibadət məkanlarının qorunmasını və tarixi abidələrin bərpasını Azərbaycandakı dini tolerantlığın nümunələri kimi qeyd edib. İşğaldan azad edilmiş ərazilərdə bərpa işlərinin Ağdam Cümə məscidindən başlaması və Şuşanın azadlığı zamanı azan səsinin ucalması da bəyanatda xalqın dini-mənəvi dəyərlərinə bağlılığın göstəricisi kimi xatırladılıb.
