Azərbaycanda məcburi köçkün statusunun verilməsi qaydalarında dəyişiklik edilib. Yeni qaydaya əsasən, işğaldan əvvəl məcburi köçkün statusu olan qadınlarla nikaha daxil olmuş kişilər də müəyyən şərtlərlə bu statusu ala biləcəklər.
Elpress.az xəbər verir ki, dəyişiklik “Məcburi köçkün” statusunun və onu təsdiq edən vəsiqənin verilməsi qaydalarını əhatə edir.
İndiyədək bu imkan yalnız işğaldan əvvəl işğal olunmuş rayonun sakini ilə ailə quran qadınlara şamil edilirdi. Yeni tənzimləmə ilə eyni hüquq kişilərə də verilir.
Qaydalara görə, müraciət edən şəxs məcburi köçkünlüyə səbəb olan hadisələrdən əvvəl həmin rayonun sakini ilə nikahda olmalı, öz rayonundakı pasport qeydiyyatından çıxmamalı, işğaldan sonra isə həyat yoldaşının yaşayış yeri üzrə qeydiyyata düşməlidir.
Status almaq istəyən şəxslər əvvəlcə müvəqqəti yaşayış yeri üzrə Qaçqınların və Məcburi Köçkünlərin İşləri üzrə Dövlət Komitəsinin regional orqanında və ya yerli bölməsində qeydiyyatdan keçməlidirlər. Ərizə və tələb olunan sənədlər elektron və ya kağız formada təqdim edilə bilər.
Müraciət edən şəxs səhhəti və ya digər səbəblərdən sənədləri özü təqdim edə bilmədikdə, bunu səlahiyyətli nümayəndəsi vasitəsilə həyata keçirə bilər. Sənədlər regional orqan və ya yerli bölmə tərəfindən 7 iş günü ərzində Dövlət Komitəsinə göndərilməlidir.
