Qurban bayramı münasibətilə işğaldan azad olunmuş Ağdam, Cəbrayıl, Füzuli və Laçın rayonlarında qurbanlıq heyvanların satışı və kəsimi üçün xüsusi xidmət məntəqələri təşkil edilib.
Elpress.az-ın Azərbaycan Qida Təhlükəsizliyi Agentliyinə (AQTA) istinadən verdiyi xəbərə görə, həmin rayonlarda stasionar kəsim-satış məntəqələri və səyyar çadırlar quraşdırılıb. Hər iki formatlı məntəqədə baytarlıq-sanitariya normalarına tam uyğun şərait yaradılıb, fasiləsiz su təchizatı isə xüsusi olaraq təmin edilib.Əhaliyə yalnız baytarlıq nəzarətindən uğurla keçmiş, sanitar-gigiyenik tələblərə cavab verən heyvanların təqdim olunması üçün bütün lazımi tədbirlər görülüb. Səyyar kəsim çadırlarında Azərbaycan Qida Təhlükəsizliyi İnstitutunun laboratoriyaları da paralel olaraq fəaliyyət göstərir. Heyvanlarda xəstəlik şübhəsi yarandığı təqdirdə daxili orqanlardan götürülən nümunələr qısa müddət ərzində müayinədən keçiriləcək.Qurban bayramı günlərində AQTA-nın regional bölmələri və institut əməkdaşları gücləndirilmiş iş rejimində çalışmaqda davam edirlər.
