Türkiyənin İzmir şəhərində yerli idarəetmə orqanını əhatə edən geniş miqyaslı korrupsiya əməliyyatı keçirilib, bir neçə nəfər həbs edilib.
ELPRESS.AZ Milli.az-a istinadən verdiyi məlumata görə, İzmir Respublika Baş Prokurorluğunun rəhbərliyi altında Güzelbahçe Bələdiyyəsində xüsusi reyd təşkil olunub. İl Jandarma Komutanlığının əməkdaşları həm bələdiyyə binasında, həm də şübhəlilərin yaşadığı ünvanlarda axtarış aparıblar.Prokurorluq bələdiyyə rəhbərliyinə qarşı irəli sürülən ittihamların ciddi sənədli əsaslara dayandığını açıqlayıb. Cinayət işi “cinayətkar dəstə yaratmaq”, “rüşvətxorluq”, “vəzifədən sui-istifadə”, “dövlətə maddi ziyan vurma” və “tikinti-şəhərsalma qanunvericiliyinin pozulması” maddələri üzrə başlanılıb.Əməliyyat nəticəsində Cümhuriyyət Xalq Partiyası (CHP) üzvü, hazırkı bələdiyyə sədri Mustafa Günay, keçmiş sədr Mustafa İnce, bələdiyyə sədrinin həyat yoldaşı və Memarlıq və Şəhərsalma şöbəsinin rəhbəri də daxil olmaqla ən azı beş nəfər saxlanılıb. Jandarmada ilkin dindirilmə və tibbi yoxlamadan sonra şübhəlilər məhkəməyə göndərilib.Məhkəmənin qərarı ilə bələdiyyə sədri Mustafa Günay və Memarlıq şöbəsinin müdiri Özgür Bayraktar həbs edilərək cəzaçəkmə müəssisəsinə yerləşdirilib. Saxlanılan digər üç nəfər, o cümlədən keçmiş sədr məhkəmə nəzarəti və xariçə çıxış qadağası şərtilə azadlığa buraxılıb. İstintaq davam etdirilir.
