107 dövlət orqanında 391 vakant vəzifə üzrə 1798 müsahibənin keçirilməsi planlaşdırılır
Elpress.az xəbər verir ki, Dövlət orqanlarında mövcud olan vakant vəzifələr üzrə keçiriləcək ümumi müsahibələrin qrafiki müəyyənləşdirilib.İyulun 15-də elan olunan müsabiqə üzrə 107 dövlət orqanında 391 vakant vəzifə namizədlərin müsahibəsinə çıxarılıb. Bu vəzifələr üzrə ümumilikdə 1798 müsahibənin keçirilməsi nəzərdə tutulur.Namizədlərin ən çox müraciət etdiyi vəzifələr arasında “YAŞAT” Fondu ilə iş şöbəsində baş məsləhətçi və Dövlət Turizm Agentliyinin Aparatında insan resurslarının idarə edilməsi sektorunda aparıcı məsləhətçi vəzifələri yer alır. Birinci vəzifə üzrə 63, ikinci vəzifə üzrə isə 42 namizəd qeydiyyatdan keçib.Müsahibələrin sentyabrın 14-dən oktyabrın 29-dək keçirilməsi planlaşdırılır. Qeydiyyatdan keçən şəxslər müsahibənin keçiriləcəyi vaxt və məkan barədə məlumatları şəxsi kabinetləri vasitəsilə əldə edə bilərlər.Namizədlərin müsahibədə iştirak etməməsi üzrlü səbəb hesab edilmir və belə hallar məsuliyyətsizlik kimi qiymətləndirilərək müvafiq məlumat bazasında qeydə alınır. İştirakdan imtina etmək istəyən namizəd bunu müsahibədən bir gün əvvəl saat 16:00-dək şəxsi kabineti vasitəsilə rəsmiləşdirə bilər.Üzrlü səbəbdən müsahibədə iştirak edə bilməyən şəxslər üçün yeni müsahibənin təşkili yalnız səbəbi təsdiqləyən müvafiq sənəd təqdim edildikdə mümkün olacaq.Namizədlərə müsahibənin başlanmasına ən azı 30 dəqiqə qalmış keçiriləcəyi ünvanda olmaları tövsiyə edilir.
