Qazi: Şəhidlərin xatirəsi onların qəhrəmanlığına layiq şəkildə əbədiləşdirilməlidir
Elpress.az xəbər verir ki, Şəhidlərin xatirəsinin qorunması və adlarının layiqincə əbədiləşdirilməsi ilə bağlı çağırış səsləndirilib.“Böyük Qayıdış” Gənclər Təşkilatının sədr müavini, ehtiyatda olan zabit və Aprel döyüşlərinin qazisi Əhliyyət Mehdiyev bildirib ki, şəhidlərin adlarının daş, divar və digər səthlərə səliqəsiz və qeyri-peşəkar formada yazılması düzgün yanaşma deyil.Onun sözlərinə görə, şəhidlərin Vətən uğrunda göstərdiyi qəhrəmanlıq və fədakarlıq onların xatirəsinə xüsusi həssaslıqla yanaşmağı tələb edir. Şəhid adlarının əbədiləşdirilməsi elə formada həyata keçirilməlidir ki, bu, onların ailə üzvləri və yaxınlarının hisslərinə hörmət ifadə etsin.Əhliyyət Mehdiyev işğaldan azad edilmiş ərazilərin Azərbaycan xalqının Qələbəsi ilə yanaşı, ağır itkilərinin də izlərini daşıdığını vurğulayıb. O qeyd edib ki, bu torpaqlarda tarixi məkanların, abidələrin və digər obyektlərin qorunmasına xüsusi diqqət göstərilməlidir.Qazinin fikrincə, şəhidlərin xatirəsinin yaşadılması yalnız onların adlarının müəyyən yerlərdə yazılması ilə məhdudlaşmamalıdır. Onların həyat və döyüş yollarının gənc nəslə çatdırılması, adlarına məktəblərdə müxtəlif tədbirlərin, yarışların keçirilməsi və muzeylərdə fəaliyyətlərinin nümayiş etdirilməsi daha böyük əhəmiyyət daşıyır.O bildirib ki, bu yanaşma şəhidlərin adlarının yalnız yazılarda deyil, insanların yaddaşında və gələcək nəsillərin düşüncəsində yaşamasına imkan verir.
