Mərkəzi icra hakimiyyəti orqanları rəhbərlərinin bölgələr üzrə vətəndaş qəbulu qrafikinə uyğun olaraq, 15 may 2026-cı ildə ekologiya və təbii sərvətlər naziri Rəşad İsmayılov Laçın rayonunda Laçın və Kəlbəcər sakinləri ilə görüş keçirib.
Elpress.az-ın məlumatına əsasən, qəbul başlamazdan öncə Ümummilli Lider Heydər Əliyevin büstü ziyarət olunub, abidə önünə gül dəstələri düzülərək xatirəsi ehtiramla yad edilib.
Görüş zamanı sakinlərin ətraf mühitin qorunması, biomüxtəlifliyin mühafizəsi, yaşıllıq sahələrinin saxlanılması, məşğulluq və digər məsələlərlə bağlı müraciətləri dinlənilib. Səsləndirilən problemlərin araşdırılması və həlli istiqamətində aidiyyəti struktur bölmələrinə tapşırıqlar verilib. Nazirliyin səlahiyyətlərinə aid olmayan müraciətlər isə baxılması üçün müvafiq qurumlara yönləndirilməsi məqsədilə qeydiyyata götürülüb.
