Fransada indiyədək əsasən heyvanlarda yayıldığı bilinən Şamonda virusunun insanda ilk təsdiqlənmiş yoluxma halı aşkarlanıb. Hadisə ilə bağlı araşdırmalar davam edir.
Elpress.az xəbər verir ki, Fransa səhiyyə qurumlarının məlumatına görə, virus ağır xəstəliyə görə Lion şəhərində müalicə alan, immun sistemi ciddi zəifləmiş pasiyentdə müəyyən edilib. O, oktyabrın əvvəlində vəfat edib. Virusun ölümə hansı dərəcədə təsir göstərdiyi hələ araşdırılır.
İlkin ehtimala əsasən, pasiyent Fransanın şərqində virus daşıyan Culicoides cinsinə aid xırda qansoran həşəratın dişləməsi nəticəsində yoluxub. Həmin ərazidə 2026-cı ilin yaz və yay aylarında virusun heyvanlar arasında yayıldığı bildirilir.
Şamonda virusu əsasən iribuynuzlu mal-qarada aşkarlanır. İndiyədək onun insandan insana keçməsi qeydə alınmayıb. Fransa və beynəlxalq səhiyyə qurumları hazırkı məlumatlara əsasən, ümumi əhali üçün sağlamlıq riski müəyyən etmədiklərini bildirirlər. Bununla belə, virusun yoluxma mexanizmi və insan sağlamlığına mümkün təsirləri araşdırılır.
