Kənd təsərrüfatı naziri Məcnun Məmmədov Lerikdə keçirilən qəbul zamanı bir neçə rayonun sakinlərinin müraciətlərini dinləyərək qaldırılan məsələlərin həlli ilə bağlı tapşırıqlar verib.
Azərbaycan Prezidenti İlham Əliyevin tapşırıq və tövsiyələrinə uyğun olaraq mərkəzi icra hakimiyyəti orqanlarının rəhbərləri bölgələrdə vətəndaş qəbullarını davam etdirirlər. Növbəti qəbul Kənd təsərrüfatı naziri Məcnun Məmmədov tərəfindən Lerik Dövlət Aqrar İnkişaf Mərkəzinin inzibati binasında keçirilib.Qəbul zamanı Lerik, Lənkəran, Astara, Masallı, Yardımlı və Cəlilabad rayonlarından olan vətəndaşların müraciətləri dinlənilib, onların ərizə və şikayətlərinə baxılıb. Görüşdən əvvəl nazir Ümummilli Lider Heydər Əliyevin abidəsini ziyarət edərək xatirəsini ehtiramla yad edib.Nazirliyin struktur bölmələrinin və tabeli qurumlarının rəhbərlərinin də iştirak etdiyi qəbulda vətəndaşlar əsasən məşğulluq, torpaq sahələrinin icarəyə verilməsi, kənd təsərrüfatı təyinatlı kreditlərin ayrılması, subsidiyaların verilməsi, kənd təsərrüfatı texnikaları ilə təminat, suvarma və digər aqrar məsələlərlə bağlı müraciətlərini səsləndiriblər.Məcnun Məmmədov hər bir müraciəti diqqətlə dinləyərək qaldırılan məsələlərin qanunvericiliyin tələblərinə uyğun şəkildə araşdırılması və operativ həlli üçün aidiyyəti qurumlara müvafiq tapşırıqlar verib. Müraciətlərin bir hissəsi yerində həll olunub, əlavə araşdırma tələb edən məsələlər isə nəzarətə götürülüb. Nazirliyin səlahiyyətlərinə aid olmayan müraciətlər isə baxılması üçün müvafiq dövlət qurumlarına yönləndirilməsi məqsədilə qeydiyyata alınıb.Görüş zamanı iştirakçılara “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın əsas istiqamətləri barədə ətraflı məlumat verilib. Eyni zamanda aqrar sahədə yeni dəstək mexanizmləri, su və torpaq ehtiyatlarından səmərəli istifadə, aqrar emal və logistika infrastrukturunun inkişafı, fermerlərin müasir xidmətlərə çıxış imkanlarının genişləndirilməsi və dövlət dəstəyi tədbirləri barədə ətraflı fikir mübadiləsi aparılıb. Bildirilib ki, dövlət başçısının aqrar sektorun inkişafına yönəlmiş qərarları kənd təsərrüfatı istehsalçılarının rifahının yüksəlməsinə və sahənin davamlı inkişafına mühüm töhfə verəcək.
