Türkiyədə güclü yağış və fırtına nəticəsində bir nəfər ölüb, 35 vilayət üçün hava xəbərdarlığı edilib.
Elpress.az xəbər verir ki, Türkiyədə Balkanlardan gələn sərin və yağışlı hava kütləsinin təsiri ilə bir sıra bölgələrdə güclü leysan yağışları və fırtına müşahidə olunub. Paytaxt Ankaranın Elmadağ rayonunda fırtına zamanı ildırımın vurduğu yaşlı kişi həyatını itirib.
Meteorologiya Baş İdarəsi ölkənin 35 vilayəti üçün hava xəbərdarlığı yayıb. Ankaranın Mamak rayonunda güclü yağış səbəbindən yol çöküb və bir avtomobil çuxura düşüb. Bundan başqa, ibtidai məktəbin divarı uçub, sel suları motosikletləri aparıb, Altındağ rayonunda yerləşən yeraltı keçidi isə su basıb.
İstanbulun Güngören rayonunda da yeraltı keçid su altında qalıb. Aidiyyəti qurumlar vətəndaşları ehtiyatlı olmağa çağırır.
