Media eksperti Müşfiq Ələsgərli Prezident İlham Əliyevin Almaniyaya rəsmi səfərinin Azərbaycan-Almaniya münasibətlərində yeni mərhələnin əsasını qoyduğunu bildirib.
Elpress.az xəbər verir ki, Mətbuat Şurası İdarə Heyətinin üzvü, media eksperti Müşfiq Ələsgərli Prezident İlham Əliyevin Almaniyaya rəsmi səfərinin geosiyasi baxımdan mühüm əhəmiyyət daşıdığını bildirib.
Onun sözlərinə görə, səfər çərçivəsində imzalanan “İkitərəfli tərəfdaşlığın Strateji Gündəliyinə dair Birgə Bəyannamə” və Azərbaycan–Almaniya Biznes Şurasının yaradılması barədə razılaşma iki ölkə arasında əməkdaşlığı keyfiyyətcə yeni mərhələyə yüksəldib.
Ekspert qeyd edib ki, Avropanın enerji təhlükəsizliyində Azərbaycanın rolu, eləcə də Orta Dəhliz üzərindən nəqliyyat-logistika imkanları Almaniyanın Azərbaycanla strateji əməkdaşlığa marağını artırır. O, həmçinin Almaniya Kansleri Fridrix Mertslə keçirilən görüşün siyasi baxımdan mühüm əhəmiyyət daşıdığını və Almaniyanın Cənubi Qafqazda sülh prosesinə dəstəyini bir daha ifadə etdiyini vurğulayıb.
