Tovuz rayonunun Cəlilli kəndində içməli su təchizatı layihəsinin açılışı həyata keçirilib.
Elpress.az AZƏRTAC-a istinadən xəbər verir ki, tədbirdə Azərbaycan Dövlət Su Ehtiyatları Agentliyinin sədr müavini İlqar Gülməmmədov, Tovuz Rayon İcra Hakimiyyətinin başçısı Məmməd Məmmədov və Azərbaycan Dövlət Su Ehtiyatları Agentliyinin tabeliyində olan Regional Su Meliorasiya Xidmətinin İdarə Heyətinin sədri Zakir Quliyev, eləcə də rayon ictimaiyyəti, şəhid ailələri, qazilər və kənd sakinləri iştirak ediblər.Bildirilib ki, regionlarda içməli su və suvarma təminatının yaxşılaşdırılması istiqamətində həyata keçirilən layihələr dayanıqlı inkişafın əsas prioritetlərindən biridir. Qeyd olunub ki, bu istiqamətdə işlər ölkə üzrə mərhələli şəkildə davam etdirilir.Layihə çərçivəsində kənddə mərkəzləşdirilmiş su təchizatı sisteminin qurulması məqsədilə mövcud şəhər su şəbəkəsindən istifadə olunaraq yeni xətlər çəkilib və müxtəlif ərazilərdə ictimai bulaqlar quraşdırılıb.Məlumata əsasən, ümumilikdə 8 kilometr su xətti inşa edilib, 27 ictimai bulaq istifadəyə verilib. Layihə Cəlilli kəndinin 2275 nəfər əhalisinin gündəlik 180 kubmetr su tələbatının ödənilməsinə imkan yaradacaq.Qeyd edək ki, Tovuz şəhərinin su təchizatı Zəyəmçay məcrasında yerləşən üfüqi suqəbuledici qurğu və Tovuzçay su anbarındakı subartezian quyuları vasitəsilə həyata keçirilir. Şəhərin su və kanalizasiya infrastrukturu üzrə ümumi şəbəkə genişliyi də açıqlanıb.
