Qlobal əmtəə bazarlarında qızıl, gümüş və misin qiyməti artıb, platin isə ucuzlaşıb.
Elpress.az xəbər verir ki, Qlobal əmtəə bazarlarında qiymətli metallar üzrə ticarət qarışıq dinamika ilə başa çatıb. COMEX birjasında avqust fyuçersləri üzrə qızılın bir troy unsiyasının qiyməti 20,60 ABŞ dolları və ya 0,51% artaraq 4 070,80 ABŞ dollarına yüksəlib. Spot qızılın qiyməti isə 0,08% bahalaşaraq 4 052,79 ABŞ dolları təşkil edib.
Gümüş də bahalaşıb. COMEX-də sentyabr fyuçersləri üzrə gümüşün qiyməti 1,47% artaraq 58,91 ABŞ dollarına çatıb. Sənaye metalları arasında misin qiyməti isə 0,22% yüksələrək 635,75 sent olub.
Bununla yanaşı, spot platinin qiyməti 0,33% azalaraq 1 592 ABŞ dollarına enib. Analitiklər qızıl və gümüşün bahalaşmasını geosiyasi risklər və investorların təhlükəsiz aktivlərə artan marağı ilə əlaqələndirirlər. ABŞ–İran gərginliyi və qlobal iqtisadi qeyri-müəyyənlik qiymətli metallara tələbi artırıb.
