Məhəmməd Hadi küçəsində yeni metro keçidi tikilir: Sakinlərin təhlükəsizlik narahatlığına cavab verildi
Elpress.az xəbər verir ki, Bakının Məhəmməd Hadi küçəsində yerləşən çoxmərtəbəli binanın sakinləri yaşayış binasının yaxınlığında aparılan tikinti işlərindən narahatlıqlarını ifadə ediblər. Sakinlərin iddiasına görə, binanın alt hissəsindən yaxınlıqdakı ticarət mərkəzinə metrodan birbaşa keçid tikilir və bu qazıntı işləri binanın təhlükəsizliyinə təhdid yaradır. Binanın komendantı İsa Talıblı isə tikinti aparılan sahənin binaya deyil, metro infrastrukturuna aid olduğunu bildirib.Məsələyə münasibət bildirən “Bakı Metropoliteni” QSC təsdiqləyib ki, “Həzi Aslanov” stansiyasının 5-ci çıxışından ticarət mərkəzinə keçidin inşası üçün müvafiq müraciət daxil olub. Qurum bütün texniki şərtlərə, tikinti norma və qaydalarına, eləcə də təhlükəsizlik tələblərinə tam riayət olunması şərti ilə keçidin tikintisinə razılıq verildiyini qeyd edib. Yeni keçid sərnişin axınının daha rahat və səmərəli idarə olunmasına xidmət edəcək.
