Ukrayna Prezidenti Volodymyr Zelenskyy Rusiyanın lideri Vladimir Putin tərəfindən 9 May münasibətilə irəli sürülən atəşkəs təşəbbüsünə münasibət bildirib.
Elpress.az – ın APA-a istinadən verdiyi məlumata əsasən, Zelenski “Telegram” paylaşımında qeyd edib ki, o, Donald Trump komandasına müraciət edərək Rusiyanın təklifinin detalları ilə bağlı dəqiq məlumat toplamağı tapşırıb. O bildirib ki, əsas məsələ Moskvada keçiriləcək parada görə qısa müddətli təhlükəsizlik tədbirlərindən, yoxsa daha geniş məzmunlu atəşkəsdən söhbət getdiyini aydınlaşdırmaqdır.
Ukrayna lideri vurğulayıb ki, ölkəsi müharibənin real şəkildə başa çatması üçün sülhə yönəlmiş diplomatik səylərini davam etdirir. Onun sözlərinə görə, Ukraynanın əsas məqsədi uzunmüddətli atəşkəsə nail olmaq, insanların təhlükəsizliyini təmin etmək və dayanıqlı sülhə zəmin yaratmaqdır.
Zelenski əlavə edib ki, bu məqsədlə Ukrayna istənilən effektiv və məqbul formatda danışıqlara hazırdır.
Xatırladaq ki, Rusiya Prezidentinin beynəlxalq məsələlər üzrə köməkçisi Yuri Ushakov Vladimir Putinin 9 May paradına qədər atəşkəs elan etməyə hazır olduğunu açıqlayıb.
