Ukrayna Silahlı Qüvvələrinin Baş Qərargahı iyulun 10-na keçən gecə Rusiyanın bir sıra strateji neft obyektlərinə və hərbi logistikasında istifadə olunduğu bildirilən 18 gəmiyə zərbələr endirildiyini açıqlayıb.
Elpress.az xəbər verir ki, Ukrayna Silahlı Qüvvələrinin Baş Qərargahının yaydığı məlumata görə, gecə saatlarında həyata keçirilən hücumlar nəticəsində Rusiyanın Krasnodar diyarındakı “İlski” neft emalı zavodunda, Leninqrad vilayətində yerləşən “NOVATEK-Ust-Luqa” neft emalı kompleksində, Rostov vilayətindəki “Kurqanneftprodukt” neft terminalında və “Azovneftprodukt” neft bazasında yanğınlar baş verib.Açıqlamada bildirilib ki, “İlski” neft emalı zavodu Rusiyanın cənub bölgəsindəki ən iri müəssisələrdən biri hesab olunur və ildə 6,6 milyon tona qədər neft emal etmək gücünə malikdir. Qeyd olunub ki, burada istehsal edilən yanacaq hərbi logistikanın təmin edilməsində də istifadə olunur.Ukrayna tərəfi həmçinin Rusiyanın hərbi logistikasında istifadə edildiyi iddia olunan 13 tanker, 3 yük gəmisi, 1 bərə və 1 köməkçi gəmi olmaqla ümumilikdə 18 gəminin də zərbəyə məruz qaldığını açıqlayıb. Bu məlumat Ukrayna Silahlı Qüvvələrinin Baş Qərargahının açıqlamasına əsaslanır. Rusiya tərəfi isə bu iddialarla bağlı hələlik rəsmi açıqlama verməyib.
