2030-cu ilədək 50-dən çox ağıllı şəhər tətbiqinin həyata keçirilməsi planlaşdırılır
Elpress.az xəbər verir ki, Türkiyədə Ətraf Mühit, Şəhərsalma və İqlim Dəyişikliyi Nazirliyi tərəfindən hazırlanan “2030-cu il Milli Ağıllı Şəhərlər Strategiyası və Fəaliyyət Planı” rəsmi şəkildə qüvvəyə minib.Beşillik yol xəritəsini müəyyən edən sənəddə şəhər idarəçiliyi, nəqliyyat, tullantıların idarə olunması, iqlim dəyişikliyi və fəlakətlərin idarə edilməsi istiqamətlərində ən azı 50 ağıllı şəhər tətbiqinin reallaşdırılması nəzərdə tutulur. Strategiyada 4 əsas məqsəd, 8 hədəf, 32 fəaliyyət istiqaməti və 297 icra mərhələsi müəyyənləşdirilib.Plana əsasən, 2026-cı ilin sonunadək Türkiyənin 81 vilayətində ağıllı şəhər strategiyalarının hazırlanması və bələdiyyələrdə bununla bağlı xüsusi bölmələrin yaradılması planlaşdırılır.2028-ci ilədək ən azı 50 ağıllı şəhər tətbiqinin istifadəyə verilməsi, 2029-cu ilədək isə bütün vilayətlərdə nəqliyyat, ətraf mühit və digər şəhər xidmətlərinin vahid mərkəzdən idarə olunmasına imkan verən “Rəqəmsal Şəhər İdarəetmə Mərkəzləri”nin yaradılması nəzərdə tutulur.Strategiyada 2030-cu ilədək ağıllı şəhər texnologiyalarında yerli istehsalın payının ən azı 80 faizə çatdırılması, 500 innovativ şirkətə dəstək verilməsi və “Ağıllı Şəhərlər haqqında” qanunun qüvvəyə minməsi də hədəflənir.Sənəddə texnoloji imkanlardan istifadə etməklə erkən xəbərdarlıq və böhranların idarə olunması sistemlərinin inkişaf etdirilməsi də nəzərdə tutulub.Bundan əlavə, yaşlı insanların, əlilliyi olan şəxslərin və rəqəmsal xidmətlərə çıxışı məhdud qrupların xidmətlərdən istifadəsinin asanlaşdırılması planlaşdırılır. Türkiyənin ağıllı şəhərlərin qurulması sahəsində əldə etdiyi təcrübənin Türk Dövlətləri Təşkilatına üzv ölkələr və digər yaxın region dövlətləri ilə paylaşılması da strategiyanın əsas istiqamətlərindəndir.
