Süni intellektin yanlış təhlili Vaşinqtonla Pekin arasında hərbi gərginlik riski yaradıb
Elpress.az xəbər verir ki, Süni intellekt sisteminin hazırladığı yanlış kəşfiyyat məlumatı ABŞ ordusunun Yaxın Şərqdə hərəkət edən Çin gəmisinə qarşı mümkün əməliyyat üçün hazırlıq görməsinə səbəb olub.Məlumata görə, İranla müharibə zamanı ABŞ hərbçilərinə Çin gəmisinin nüvə silahı proqramında istifadə olunan komponentləri daşıdığı barədə kəşfiyyat hesabatı təqdim edilib. Bu məlumat orduda ciddi narahatlıq yaradıb və gəminin ələ keçirilməsi ilə bağlı hazırlıqlara başlanılıb.Əməliyyatın icrasından əvvəl aparılan əlavə yoxlama zamanı hesabatın ABŞ Xüsusi Əməliyyatlar Komandanlığının analitiki tərəfindən süni intellekt çat-botunun köməyi ilə hazırlandığı müəyyənləşib. AI sistemi gəminin yükü ilə bağlı məlumatları yanlış təhlil edərək səhv nəticəyə gəlib və həmin nəticə əsasında hazırlanmış hesabat hərbi strukturlar daxilində yayılıb.Mənbələrin bildirdiyinə görə, hesabatdakı məlumatlar tamamilə yanlış olub. ABŞ hərbçilərinin Çin gəmisinə qarşı əməliyyat keçirməsi iki ölkə arasında ciddi hərbi qarşıdurma riskini artıra bilərdi.Hadisə hərbi və kəşfiyyat fəaliyyətində süni intellektdən istifadə zamanı məlumatların insan tərəfindən yoxlanılmasının əhəmiyyətini və texnologiyanın yaratdığı mümkün riskləri yenidən gündəmə gətirib.
