Şimali Koreya hərbçiləri Şərq dənizi istiqamətində ballistik raket buraxıb. Raketin 700 kilometrdən artıq məsafə qət etdiyi bildirilir.
Elpress.az xəbər verir ki, Cənubi Koreyanın Qərargah Rəisləri Komitəsinin məlumatına görə, raket Şimali Koreyanın Vonsan bölgəsindən yerli vaxtla səhər saatlarında buraxılıb.
Buraxılışdan sonra Cənubi Koreya Prezident Administrasiyasının Milli Təhlükəsizlik İdarəsində təcili toplantı keçirilib. Görüş zamanı raket sınağının mümkün təhlükəsizlik təsirləri qiymətləndirilib və ordunun cavab tədbirlərinə hazırlıq vəziyyəti nəzərdən keçirilib.
Cənubi Koreya, ABŞ və Yaponiya arasında buraxılışla bağlı kəşfiyyat məlumatlarının mübadiləsinin aparıldığı açıqlanıb.
Cənubi Koreya tərəfi raket sınağının BMT Təhlükəsizlik Şurasının qətnamələrinə zidd olduğunu bildirib və Pxenyanı bu cür addımları dayandırmağa çağırıb.
Yaponiya Müdafiə Nazirliyi də buraxılan obyektin ballistik raket olduğunu ehtimal edir. Yaponiya rəsmiləri dənizçilərə raketin mümkün qalıqlarından uzaq durmaq barədə xəbərdarlıq edib.
Qeyd edək ki, Şimali Koreyanın bundan əvvəl analoji raket buraxılışını sentyabrın 20-də həyata keçirdiyi bildirilir.
