Qazaxıstanın Astana şəhərində TRASEKA Hökumətlərarası Komissiyasının XVIII illik toplantısı təşkil olunub.
Elpress.az-ın Azərtac-a istinadən verdiyi məlumata əsasən, tədbirdə üzv dövlətlərin nümayəndələri, TRASEKA-nın Daimi Katibliyinin təmsilçiləri, müşahidəçi ölkələr, eləcə də beynəlxalq qurumlar və tərəfdaş təşkilatlar iştirak edirlər.
Müzakirələr zamanı beynəlxalq nəqliyyat marşrutlarının inkişaf etdirilməsi, region ölkələrinin tranzit imkanlarının artırılması və TRASEKA çərçivəsində əməkdaşlığın möhkəmləndirilməsi diqqət mərkəzində olacaq.
Toplantı çərçivəsində təşkilata sədrliyin Qazaxıstana verilməsi, nümayəndə heyəti rəhbərlərinin çıxışları, nəqliyyat və tranzit sahəsinə dair sənədlərin imzalanması, həmçinin TRASEKA Daimi Katibliyinin yeni Baş katibinin seçilməsi planlaşdırılır.
Qeyd edək ki, TRASEKA Avropa–Qafqaz–Asiya nəqliyyat dəhlizinin inkişafına dair Əsas Çoxtərəfli Sazişə qoşulmuş 14 ölkəni birləşdirən beynəlxalq proqramdır. Bu ölkələr sırasında Azərbaycan, Ermənistan, Bolqarıstan, Gürcüstan, İran, Qazaxıstan, Qırğızıstan, Moldova, Rumıniya, Tacikistan, Türkmənistan, Türkiyə, Özbəkistan və Ukrayna yer alır.
