Türkiyə Milli Kəşfiyyat Təşkilatının (MİT) rəhbəri İbrahim Kalın Qahirəyə səfər edib və Qəzza zolağında atəşkəs razılaşmasının ikinci mərhələsinin həyata keçirilməsi istiqamətində aparılan səylər çərçivəsində Fələstin qruplarının nümayəndələri, eləcə də prosesə qarant ölkələr olan Misir və Qətərin rəsmiləri ilə geniş tərkibli danışıqlar aparıb. Görüşlərdə bölgədə gərginliyin azaldılması, atəşkəsin davamlılığının təmin olunması və humanitar vəziyyətin yaxşılaşdırılması kimi məsələlər ətrafında fikir mübadiləsi aparıldığı bildirilib.
Misirin paytaxtı Qahirədə Qəzza zolağında davam edən sülh prosesinin gələcək mərhələləri və sahədə mövcud maneələrin aradan qaldırılmasına yönəlmiş “yol xəritəsi” layihəsi ətrafında geniş müzakirələr aparılıb. Görüşlərdə Türkiyə Milli Kəşfiyyat Təşkilatının (MİT) rəhbəri İbrahim Kalının da iştirakı ilə Fələstin qruplarının nümayəndələri və prosesə qarant ölkələr kimi çıxış edən Misir və Qətər rəsmiləri arasında fikir mübadiləsi həyata keçirilib.Danışıqlarda əsas diqqət razılaşmanın birinci mərhələsi üzrə götürülən öhdəliklərin icrasına, bölgəyə humanitar yardımların fasiləsiz və daha geniş həcmdə çatdırılmasına, həmçinin yerlərdə sabitliyin və atəşkəs rejiminin qorunmasına yönəlmiş tədbirlərin gücləndirilməsinə ayrılıb.Qeyd olunur ki, Qəzzada atəşkəs rejimi 2025-ci il oktyabrın 10-da qüvvəyə minib və ilkin mərhələdə girovların qarşılıqlı şəkildə əsirlərlə dəyişdirilməsi, humanitar yardım axınının artırılması və Qəzza zolağından qismən qoşun çıxarılması kimi addımların atılması razılaşdırılıb.Sazişin nəzərdə tutulan ikinci mərhələsi isə daha geniş çərçivəni əhatə edir: anklavın idarəetmə sisteminin formalaşdırılması və bərpası, beynəlxalq qüvvələrin bölgədə yerləşdirilməsi, hərbi bölmələrin mərhələli şəkildə çıxarılması və ümumi təhlükəsizlik mexanizmlərinin yekunlaşdırılması kimi mühüm məsələlər bu mərhələnin əsas istiqamətləri arasında yer alır.
