Azərbaycan Dövlət Milli Gənc Tamaşaçılar Teatrında Samuel Bekketin eyniadlı pyesi əsasında hazırlanan “Qodo həsrətində” tamaşası ilk dəfə tamaşaçılara təqdim edilib.
Elpress.az xəbər verir ki, səhnə əsərinin quruluşçu rejissoru Əməkdar artist Şövqi Hüseynovdur. Tamaşanın səhnə tərtibatını Zaur Abasov, səs tərtibatını Zaur Rəşidova, işıq tərtibatını Vadim Kuskov hazırlayıb. Rejissor assistenti Nəsibə Canəliyevadır.
Tamaşada Şövqi Hüseynov və Əməkdar artist Elnur Bəhramxanla yanaşı, Kərəm Hadızadə, Nurlan Süleymanlı və Lalə Qarayeva da rol alıblar.
Əsərin əsas qəhrəmanları Vladimir və Estraqondur. Onlar kim olduğu və gəlib-gəlməyəcəyi bilinməyən Qodonu gözləyirlər. Gözləntinin uzanması qəhrəmanların tənhalığını, qorxularını və ümidsizliyini daha da dərinləşdirir.
Bekketin fəlsəfi məzmun daşıyan əsərində gözləmək anlayışı insanın xaos içində məna və sığınacaq axtarışı, eləcə də inamla bağlı suallar fonunda təqdim olunur.
