Hər il iyulun 11-i bütün dünyada atların insan həyatındakı əhəmiyyətini vurğulamaq məqsədilə Ümumdünya At Günü kimi qeyd olunur.
Elpress.az xəbər verir ki , Birləşmiş Millətlər Təşkilatının Baş Assambleyasının qərarına əsasən, iyulun 11-i Ümumdünya At Günü kimi qeyd edilir. Bu beynəlxalq gün 2025-ci ilin iyun ayında qəbul edilən 79/291 saylı qətnamə ilə təsis olunub.Monqolustanın təşəbbüsü ilə yaradılan bu günə dair qətnamənin həmmüəllifləri 56 ölkə olub, sənəd isə 169 nümayəndə heyəti tərəfindən dəstəklənib. Təşəbbüsün əsas məqsədi atların insanların iqtisadi və sosial həyatındakı roluna diqqət çəkmək, eyni zamanda onların sayının və populyasiyasının qorunmasının vacibliyini ön plana çıxarmaqdır.BMT-nin Ərzaq və Kənd Təsərrüfatı Təşkilatının (FAO) məlumatına görə, hazırda dünyada təxminən 60,8 milyon at mövcuddur. Bu heyvanlardan idman, turizm, nəqliyyat, istirahət, səhiyyə və qida sənayesi də daxil olmaqla bir çox sahədə geniş istifadə edilir. Xüsusilə ucqar bölgələrdə yaşayan insanlar üçün atlar həm gündəlik həyatın ayrılmaz hissəsi, həm də sosial-iqtisadi inkişafın mühüm amillərindən biri hesab olunur.Mütəxəssislərin fikrincə, müasir ev atı (Equus caballus) qədim vəhşi atların nəslindəndir və onların təxminən 4 200 il əvvəl əhliləşdirildiyi ehtimal olunur. Elektrik və mühərriklərin ixtirasına qədər insanlar ağır fiziki işlərin böyük hissəsini atların köməyi ilə yerinə yetirib. Hətta buxar maşınının gücü atın gücü ilə müqayisə olunduğu üçün bu gün də istifadə edilən “at gücü” anlayışı yaranıb.Hazırda da dünyanın bir çox ölkəsində atçılıq kənd təsərrüfatı, turizm, idman, hüquq-mühafizə fəaliyyəti və digər sahələrdə mühüm rol oynayır. Bununla yanaşı, texnoloji inkişaf, iqtisadi dəyişikliklər və ekoloji problemlər səbəbindən son illərdə həm atların sayı, həm də atçılıq sənayesinin miqyası tədricən azalır.Ümumdünya At Günü bu dəyərli heyvanların qorunmasının vacibliyini xatırlatmaq, eləcə də onların bəşəriyyətin sosial və iqtisadi inkişafına verdiyi töhfəni bir daha diqqətə çatdırmaq məqsədi daşıyır.
