Qırğızıstanın paytaxtında Türk dünyasının ortaq dil və mədəni irsinə həsr olunan beynəlxalq elmi-praktik konfrans təşkil edilib.
Elpress.az xəbər verir ki, tədbir Yusif Balasaqunlu adına Qırğız Milli Universitetində “Türk dünyasında Azərbaycan dili və ədəbiyyatı” mövzusunda keçirilib. Konfrans universitetin və Birinci Bakı Türkoloji Qurultayının 100 illik yubileylərinə həsr olunub.
Təşkilatçılar sırasında Qırğız Milli Universiteti, Qırğızıstan Azərbaycanlılarının “Birlik” İctimai Birliyi və Xəzər Universiteti yer alıb. Görüşə Azərbaycan, Türkiyə, Özbəkistan, Qazaxıstan və Türkmənistandan alimlər, tədqiqatçılar və təhsil sahəsinin nümayəndələri qatılıblar.
İştirakçılar Azərbaycan dili və ədəbiyyatının araşdırılması, ortaq mədəni irsin qorunması və elmi əlaqələrin genişləndirilməsi məsələlərini müzakirə ediblər. Çıxışlarda 1926-cı ildə keçirilmiş Birinci Bakı Türkoloji Qurultayının türk dillərinin, yazı sistemlərinin və mədəniyyətinin öyrənilməsindəki rolu da diqqətə çatdırılıb.
Konfrans çərçivəsində “Birlik” İctimai Birliyinin Qırğızıstanda Azərbaycan dilinin və mədəniyyətinin yaşadılması, eləcə də iki ölkə arasındakı münasibətlərin inkişafı istiqamətində gördüyü işlər vurğulanıb. Tədbirin Azərbaycan-Qırğızıstan humanitar əlaqələrinin və türk xalqları arasında dostluğun möhkəmlənməsinə xidmət etdiyi bildirilib.
