Elpress.az xəbər verir ki, ABŞ ilə İran arasında dolayı danışıqların növbəti mərhələsinin iyulun 18-də keçirilməsi nəzərdə tutulur.
Məlumata görə, danışıqların gündəmində tərəflər arasında qarşılıqlı öhdəliklərin icrası, xüsusilə də İrana məxsus dondurulmuş maliyyə vəsaitlərinin taleyi əsas müzakirə mövzularından biri olacaq. Bildirilir ki, bu vəsaitlərin istifadəsi ilə bağlı hər hansı qərar yalnız Tehranın üzərinə götürdüyü öhdəlikləri tam yerinə yetirməsi və bunun praktik addımlarla təsdiqlənməsindən sonra mümkün hesab edilir.
Qeyd olunur ki, bu öhdəliklər sırasında Hörmüz boğazında beynəlxalq gəmiçiliyin təhlükəsizliyinin təmin olunması da xüsusi yer tutur.
Bununla yanaşı, İran Silahlı Qüvvələrinin Birləşmiş Komandanlığı ABŞ-ın Hörmüz boğazının hava məkanında hərbi mövcudluğunu davam etdirməsini regionun təhlükəsizliyi üçün risk kimi qiymətləndirib.
Rəsmi bəyanatda vurğulanıb ki, ABŞ tərəfindən boğaz ətrafında atılacaq istənilən addıma operativ və qətiyyətli cavab veriləcək. Həmçinin qeyd edilib ki, Hörmüz boğazından keçən bütün gəmilər İranın müəyyən etdiyi dəniz marşrutlarına riayət etməlidirlər.
