ABŞ ordusu İranla bağlı hərbi əməliyyatlar zamanı ciddi pilotsuz uçuş aparatı itkisi ilə üzləşib. Elpress.az-ın “Bloomberg”-ə istinadən verdiyi məlumata əsasən, Tehran qüvvələri ABŞ-ın ən müasir hücum və kəşfiyyat dronlarından sayılan MQ-9 Reaper-lərin böyük hissəsini sıradan çıxarmağa nail olub. Bildirilir ki, vurulan aparatların sayı iyirmidən artıqdır və bu göstərici Pentaqonun əməliyyatlardan əvvəl malik olduğu ümumi Reaper parkının təxminən beşdə birinə bərabərdir.
Məlumata görə, İran hava hücumundan müdafiə sistemləri və digər vasitələrlə ABŞ-a məxsus bahalı pilotsuz aparatları ardıcıl şəkildə hədəfə alıb. Hər bir MQ-9 Reaper yüksək texnologiyalı müşahidə sistemləri, müasir kameralar və uzaqmənzilli kəşfiyyat avadanlıqları ilə təchiz olunur. Bununla yanaşı, bu dronlar “Hellfire” raketləri və yüksək dəqiqlikli JDAM bombaları da daşıya bilir.
