Yasamal rayonunda nəqliyyat infrastrukturunun müasirləşdirilməsi istiqamətində genişmiqyaslı yol-təmir işləri davam etdirilir. Rayonun əsas küçələri ilə yanaşı, məhəllədaxili yollarda da asfalt örtüyünün yenilənməsi həyata keçirilir.
Elpress.az xəbər verir ki, aparılan işlər paytaxtın yol şəbəkəsinin yaxşılaşdırılması və sakinlərin rahat gediş-gəlişinin təmin olunması məqsədi daşıyır.Hazırda Hüseyn Cavid prospektinin müxtəlif hissələrində, Nazim Hikmət, Şeyx Məhəmməd Xiyabani və Ayna Sultanova küçələrində, eləcə də Kənar Dairəvi yolun müəyyən hissəsində köhnə asfalt qatı sökülərək yeni yol örtüyü salınır.
Bununla yanaşı, yaşayış massivlərində yerləşən daxili yollar da mərhələli şəkildə təmir olunur.Layihə çərçivəsində yol örtüyünün keyfiyyətinin artırılması, hərəkətin təhlükəsizliyinin təmin edilməsi və nəqliyyatın daha rahat təşkilinə yönəlmiş tədbirlər görülür. Yenilənən küçələrdə həm sürücülər, həm də piyadalar üçün daha əlverişli şərait yaradılması nəzərdə tutulur.Məlumata görə, rayonda abadlıq və infrastrukturun yenilənməsi ilə bağlı tədbirlər növbəti mərhələlərdə də davam etdiriləcək.
Həyata keçirilən işlərin Yasamalın şəhərsalma görünüşünün yaxşılaşmasına və sakinlərin gündəlik həyatına müsbət təsir göstərəcəyi bildirilir.
