Elpress.az xəbər verir ki, bir qrup vətəndaş “Aid-Group” xaricdə təhsil şirkəti və onun rəhbəri Nigar Fərhaddan şikayətçi olduqlarını bildirir.
Şikayətçilərdən Aliyə Əfəndiyevanın sözlərinə görə, sosial şəbəkələrdə şirkətin reklamını gördükdən sonra müraciət edib və üç övladının Kanadada təhsil alması üçün bu ilin mart ayında şirkətlə müqavilə bağlayıb.Onun iddiasına görə, bunun üçün 17 min manat ödəniş etsə də, sonradan şirkət rəhbəri və əməkdaşları ilə əlaqə saxlamaq mümkün olmayıb.
Digər şikayətçi Ramin Bedimirzadə isə ABŞ-də təhsil almaq məqsədilə şirkətlə müqavilə bağladığını və 4350 manat ödədiyini bildirib. O iddia edir ki, nə təhsil prosesi başlayıb, nə də ödəniş etdiyi məbləğ geri qaytarılıb.
Şikayətçilərin sözlərinə görə, zərərçəkənlərin sayı bununla məhdudlaşmır. Onlar bildirirlər ki, çox sayda vətəndaş oxşar problemlə üzləşib və ümumi maddi ziyanın məbləği kifayət qədər böyükdür.
Məsələ ilə bağlı zərərçəkənlərin hüquq-mühafizə orqanlarına müraciət etdikləri bildirilir.
Qeyd: Xəbərdə yer alan iddialar şikayətçilərin açıqlamalarına əsaslanır. Qarşı tərəfin mövqeyi açıqlandığı təqdirdə, dərc olunmağa hazırdır.
